Editorial i portalit Politiko.makdomen.net
Shkup, 20 mars-Kishte shumë “zell” te një pjesë kundërshtarëve të Ali Ahmetit dhe Artan Grubit se tubimi i sontëm do të dështojë. Supozonin se pas një tubimi të ngjashëm kohë më parë nga oponenca e brendshme kur deshën të dërgojnë mesazhin se “Çairi është me të zjarrtët”, në të njëjtin vend nuk mund të mblidhen njerëz që do ta tejkalojnë atë për nga numri i pjesëmarrësve. Ndodhi e kundërta!
Ndodhi që Çairi vërtet mezi kishte pritur liderin e BDI-së dhe të tregojë se ai ambient sportiv i sallës “Shaban Tërstena” është i vogël për t’i tubuar gjithë anëtarësinë dhe simpatizantët që kurrë nuk janë larguar rruga e Liderit, i cili ka qenë dhe mbetet fytyrë identifikimi dhe uniteti në BDI.
Kjo, sa i përket iluzionit që kanë mundur të tentojnë ta krijojnë ata që po largohen nga kjo rrugë uniteti. Në anën tjetër, ka dhe dallime përmbajtësore.
Te tubimi i parë i oponencës së brendshme, dominonin akuza, denoncime ndaj bashkëpartiakëve, deri në denigrim personaliteti, ndërkaq në tubimin e sontëm flitej për çështje programore, flitej për rrugën e BE-së, nuk i mbylleshin dyert askujt për të ikur, e për ata që duan të ikin u shtrihej dorë e pajtimit me qëllim të tejkalimit të përçarjeve, për të mos qenë BDI-ja satisfaksion për partitë që e duan të dobët, të rrënuar dhe humbëse.
Nga fjalimet e udhëheqësve më të lartë të BDI-së u dhanë porositë e qarta, anëtarësia dhe simpatizantët ishin të pranishëm masovikisht për t’i shprehur përkrahjen Ali Ahmetit. Do të ishte e padrejtë që kjo anëtarësi të zgjedhë midis Ali Ahmetit dhe të pakënaqurve që kanë motive të tjera e jo programatike.
Prej sonte, kjo dilemë më nuk ekziston.