Sekretari amerikan Antony Blinken ndodhet në Lindjen e Mesme, ku zhvilloi fillimisht bisedime në Arabinë Saudite. Ai u shpreh optimist për arritjen e një marrëveshje armëpushimi në Gaza, në një kohë që tensionet rriten mes Uashingtonit dhe Izraelit.
Blinken takoi Princin Faisal bin Farhan, ministrin e jashtëm saudit dhe zhvilloi bisedime me princin e kurorës Mohammed bin Salman. Blinken ka planifikuar të takohet me ministrat e jashtëm të Egjiptit, Arabisë Saudite, Katarit dhe Jordanisë dhe një zyrtar të lartë palestinez në Kajro. Vizita vjen mes tensioneve mbi planet izraelite për një sulm ushtarak në qytetin jugor të Gazës, Rafah.
Bisedimet për një marrëveshje armëpushimi vijojnë në Katar këtë javë pas përpjekjeve të dështuara për të siguruar një marrëveshje përpara fillimit të muajit të shenjtë mysliman të Ramazanit. Zyrtarët e Katarit thanë se ishin optimistë pas bisedimeve me shefin e inteligjencës izraelite në Doha, megjithëse zëdhënësi i Ministrisë së Jashtme të Katarit, ka bërë të ditur se një operacion tokësor izraelit në Rafah në Gazën jugore do të frenonte çdo bisedim. Blinken do ta mbyllë turneun e tij duke vizituar Izraelin.
Ndërkaq më shumë se 100 palestinezë janë vrarë nga sulmet izraelite në të gjithë Gazën në 24 orët e fundit. Ushtria izraelite vrau rreth 90 persona të armatosur dhe arrestoi 160 në një bastisje në spitalin al-Shifa të Gazës , një pretendim që Hamasi e ka mohuar. Forcat izraelite gjetën brenda spitalit para dhe armë dhe pjesëtarë të Hamasit e “Grupet e Xhihadit Islamik”. Ditët e fundit sulmet janë intensifikuar rreth këtij spitali dikur spitali më i madh i Gazës që tani është një nga të paktët që funksionon edhe pjesërisht në veri.
OKB-ja ka bërë sërish thirrje për dërgimin e ndihmave teksa i gjithë Rripi i Gazës është vetëm një hap larg urisë katastrofike. 2.2 milionë njerëz në Gaza nuk kanë ushqim të mjaftueshëm, në një kohë që gjysma e popullsisë është në prag të urisë, situatë që pritet të kulmojë në veri midis mesit të prillit dhe majit 2024. Të paktën 25 njerëz, përfshirë fëmijë kanë vdekur nga uria dhe dehidratimi në veri, sipas Ministrisë së Shëndetësisë në Gaza.