Eric Schmidt, ish-drejtori i Google, ka alarmuar se inteligjenca artificiale (AI) mund të bëhet armike e njerëzimit në një afat prej pesë ose dhjetë vjetësh, dhe se kompanitë teknologjike nuk po ndërmarrin masa për të parandaluar këtë skenar.
Në një intervistë të dhënë në samitin Axios AI+ Summit, Schmidt e krahasoi AI me armët bërthamore të Luftës së Dytë Botërore, dhe tha se pas shpërthimeve në Nagasaki dhe Hiroshima, u deshën 18 vjet për të arritur një traktat për ndalimin e testeve bërthamore, “ndërsa sot situata mund të jetë e ngjashme me AI”.
Ai theksoi se rreziku qëndron kur “kompjuterët fillojnë të vendosin vetë për të bërë gjëra”, siç është gjetja ose përdorimi i armëve.
Schmidt tha se studiuesit e AI më parë mendonin se ky rrezik ishte larg, por tani thonë se mund të ndodhë brenda disa viteve. Ai propozoi krijimin e një organizate globale si ajo për “ndryshimet klimatike” për të informuar dhe këshilluar politikanët.
Pavarësisht nga këto paralajmërime, ish-kreu i Google tha se AI mund të jetë një mjet pozitiv për njerëzimin.
“Unë nuk mund të them se një mjek apo një arsimtar që përdor AI është diçka negative,” tha ai për Axios. (politiko.makdomen.net)