Një zyrtar izraelit i cili nuk dëshiroi të identifikohej, për transmetuesin shtetëror izraelit, “KAN” tha: “Deri tani, nuk ka asnjë shenjë për një avancim në bisedimet me Hamasin”.
Zyrtari tha se grupi Hamas është i pakompromis dhe po rrit kushtet e tij, por tha se dialogu vazhdon. Kryeministri izraelit, Benjamin Netanyahu, foli të hënën për një plan izraelit për të arritur lirimin e pengjeve të mbajtura nga Hamasi, por nuk dha hollësi. Sipas raportimeve të mediave perëndimore, më parë Hamasi kishte hedhur poshtë propozimin izraelit për një ndërprerje dy-mujore të luftimeve në shkëmbim të lirimit të planifikuar të pengjeve.
Hamasi mendohet se ka nën kontroll rreth 136 izraelitë pas sulmit të tij kufitar më 7 tetor. Izraeli që atëherë ka filluar një ofensivë shkatërrimtare kundër Rripit të Gazës, duke vrarë të paktën 25.700 palestinezë dhe duke plagosur 63.740 të tjerë. Rreth 1.200 izraelitë mendohet se kanë humbur jetën sipas të dhënave zyrtare.
Përpjekjet e ndërmjetësuara nga Egjipti, Katari dhe SHBA deri më tani kanë qenë të pashpresa për të siguruar lirimin e një grupi tjetër pengjesh pasi Hamasi kërkon të ndalet ofensiva shkatërrimtare e Izraelit kundër Gazës. (bild.mk)