Micheline Calmy-Rey, ish-presidentja e Zvicrës, ka reflektuar mbi sfidat që do të përballej nëse do të ishte në krye të qeverisë së Kosovës. Në një intervistë të dhënë për swissinfo.ch, ajo ka theksuar se tensionet aktuale me Serbinë janë një pengesë e madhe në rrugën e Kosovës drejt njohjeve ndërkombëtare.
“Nëse do të isha në pozitën e kryeministres së Kosovës, do të hasja në vështirësi të mëdha në drejtimin e vendit,” u shpreh Calmy-Rey.
Ajo ka vënë në dukje situatën komplekse në veriun e Kosovës, ku një pjesë e popullsisë serbe mbështet një sistem social paralel dhe refuzon autoritetin e qeverisë qendrore në Prishtinë.
“Kjo zonë karakterizohet nga një strukturë sociale dhe arsimore që funksionon nën ndikimin e Serbisë, duke e bërë Kosovën një vend sfidues për t’u qeverisur,” shtoi ish-presidentja.
Calmy-Rey gjithashtu ka komentuar mbi rolin e Bashkimit Europian si ndërmjetësues në dialogun mes Kosovës dhe Serbisë, duke theksuar se disa nga udhëheqësit e BE-së vijnë nga shtete që ende nuk e kanë njohur pavarësinë e Kosovës.
Në një ngjarje të ndodhur një vit më parë, Calmy-Rey u nderua në Kosovë me medaljen “Urdhri i Pavarësisë”, e cila iu dorëzua nga Presidentja Vjosa Osmani, si një shenjë e mirënjohjes për mbështetjen e saj ndaj Kosovës. (politiko.makdomen.net)