Kreu i Bashkisë së Tiranës, Erion Veliaj në ngjarjen Parada Shqiptare e cila po zhvillohet në kryeqytetin shqiptar tha se si asnjëherë më parë, ky 28 nëntor i gjen shqiptarët më të bashkuar së kurrë, jo vetëm nga karakteri festiv por edhe nga ai institucional dhe sukseset e panumërta që kanë arritur ndër vite.
Veliaj teksa foli për shtetin e Kosovës dhe krenarinë e Ushtrisë Çlirimtare të Kosovës, tha se edhe shqiptarët në Maqedoninë e Veriut janë histori suksesi, sepse se shpejti do të kenë kryeministrin e parë shqiptar, teksa përmendi dhe projektin Korridori 8 si investimin më të rëndësishëm infrastrukturor që lidh të gjitha vendet e rajonit.
“Përshëndes të gjithë vëllezërit dhe motrat nga Maqedonia e Veriut, ju them se në Tiranë ju jeni në shtëpinë tuaj, ndaj uroj që edhe projekti madhor si Korridori 8 të përfundoj sa më shpejtë më punë intensive nga autoritetet shqiptare atje dhe kjo lidhje që e kemi të forcohet dhe më shumë. Shqiptarët në Maqedoni janë më të fortë se kurrë. Kemi një zëvendëskryeministër, shumë shpejt do të kemi dhe kryeministrin shqiptar, shqiptarët tashmë i kemi në pozita udhëheqëse në Maqedoni, Mal të Zi, Kosovë dhe Shqipëri”, deklaroi Veliaj.