Një grup policësh shqiptaro-amerikanë kanë dhuruar 60 mijë dollarë për familjen e policit kosovar Afrim Bunjaku, i cili u vra në veri të Kosovës, më 24 shtator.
Çeku i dhurimit u dorzua në mënyrë simbolike nga disa anëtarë të Shoqatës Amerikane Shqiptare të Zbatimit të Ligjit (AALEA) në mjediset e Konsullatës së Kosovës në New York, në prani të Konsullit të Përgjithshëm – Ambasador Blerim Reka dhe stafit të tij.
Drejtori i Përgjithshëm i Policisë së Kosovës, Gazmend Hoxha, pranoi çekun dhe falenderoi policët shqiptaro-amerikan për solidaritetin dhe respektin e tyre ndaj kolegut të tyre.
“Ky akt i tyre tregon se ata janë pjesë e familjes sonë policore dhe se ata ndajnë dhimbjen tonë për humbjen e Afrimit, një hero i vërtet i Kosovës”, tha Hoxha.
Policët shqiptaro-amerikanë thanë se me këtë gjest kanë dashur të shprehin vlerësimin dhe mirënjohjen e tyre për sakrificën e policit Bunjaku, i cili la pas tre fëmijë, dy djem dhe një vajzë dhe familjen e tij.
“Ne e kemi të qartë se kjo shumë nuk e zëvendëson Afrimin, por le të shërbejë si shenjë kujtimi, respekti dhe mirënjohjeje për familjen e tij, Zoti e bekoftë familjen e Afrimit, Zoti i bekoftë punonjësit e Policisë së Kosovës, Zoti i bekoftë shqiptarë”, thanë ata.
Ky nuk është aksioni i parë që policët shqiptaro-amerikanë kanë ndërmarrë për të mbështetur kolegët e tyre në Shqipëri dhe trojet shqiptare. Edhe më herët, përmes shoqatës së tyre, ata kanë kryer disa aksione në ndihmë të familjeve të policëve të vrarë në krye të detyrës apo në raste emergjente. (politiko.makdomen.net)