Stambolli është në përgatitjet e fundit për finalen e Ligës së Kampioneve. Punonjësit dhe organziatorët kanë bërë gjithçka gati në stadiumin “Ataturk”, që do të presë Manchester Cityn dhe Interin si dhe tifozët.
Jashtë impiantit janë vendosur katër skulptura gjigande të Lionel Mesit, Cristiano Ronaldos, Stiven Xherardit dhe Gareth Bejlit.
Veprat e artit i vizitoi edhe holandezi Uesli Shnajder, i cili ka luajtur më parë për Gallatasarajin.
Në vitin 2010 ai fitoi Ligën e Kampioneve me Interin, duke u shpallur edhe lojtari i ndeshjes.
“Guardiola e ka ndërtuar ekipin si ka dashur. Iu deshën disa vite, por mendoj se tani City ka arritur një nivel të lartë dhe më lejoni ta them, do të jetë shumë e vështirë për Interin që t’i mundë ata. Por ndodhen në finale dhe një finale ngelet finale. Mendoj se sfida do të shkojë me penallti. Do të përfundojë 1-1. Dhe Interi do të fitojë me penallti”, thotë Shnajder.
Ndërkohë futbollistët e Cityt dhe të Interit mbërritën në Stamboll, e kanë kryer stërvitjen e parë në stadiumin Olimpik Ataturk.
Cityzens synojnë që të fitojnë tripletë në këtë sezon, e të përsërisin suksesin e United në 1999.
Ndërkohë zikaltrit duan që të ringrenë trofeun pas triumfit që e arritën në 2010. Skuadra e Inzagit pësoi 3 gola në 6 takime në fazën e eliminimit direkt, duke mundur Porton, Benfikën e Milanin.
Ndërkohë që në metropolin turk u ekspozua edhe trofeu i kompeticionit më të lakmuar në Europë, që ngjalli kureshtje nga tifozët, e po ashtu një Kupë më e madhe, me tifozët që patën mundësinë të bënin edhe fotografi.
Klan News