Nga 1 janari 2024, qytetarët e Kosovës do të kenë dy avantazhe të mëdha kur udhëtojnë për në Bashkimin Evropian: nuk do të kenë nevojë për viza dhe do të fluturojnë më shpejt. Këto janë rezultatet e hapjes së korridoreve ajrore mes Kosovës dhe Shqipërisë, të cilat u bënë të ditura nga Ministri i Infrastrukturës në Kosovë, Liburn Aliu, në një postim në Facebook.
Ai tha se kjo marrëveshje, e arritur në vitin 2020, do të shkurtojë kohën e fluturimit drejt vendeve të Perëndimit për rreth 15 minuta, duke përdorur dy pika koordinuese ajrore, Kukad dhe Arbër. Ai shtoi se kjo do të kursejë edhe para për bashkëatdhetarët e tij, të cilët do të përfitojnë nga liberalizimi i vizave që hyn në fuqi në fillim të vitit të ardhshëm. Kosova ishte vendi i fundit në Ballkanin Perëndimor që nuk kishte lëvizje të lirë në zonën Schengen.
Një ekspert i aviacionit, Albion Idrizi, në një intervistë për “Radion Evropa e Lirë” se hapja e korridorit ajror me Shqipërinë do të ulë edhe çmimin e biletave nga Kosova për në BE. Ai vlerësoi se çmimi mesatar i një bilete njëdrejtimëshe, që tani është 140 euro, mund të bjerë deri në 132 euro, duke kursyer 8 euro për çdo udhëtim.
Fluturimet nga dhe në Aeroportin Ndërkombëtar të Prishtinës “Adem Jashari” kanë qenë të kufizuara nga korridori ajror me Maqedoninë e Veriut që nga paslufta, më 1999. Hapësira e lartë ajrore e Kosovës, mbi 6.200 metra, është nën kontrollin e Hungarisë, ndërsa siguria e hapësirës ajrore është nën përgjegjësinë e komandantit të KFOR-it, sipas Rezolutës 1244 të OKB-së.
Miliona persona udhëtojnë për dhe nga aeroporti i Prishtinës çdo vit. Destinacionet më popullore janë Zvicra, Gjermania, Turqia, Austria dhe Mbretëria e Bashkuar. (bild.mk)