Ministri i Jashtëm i Italisë, Antonio Tajani, ka dënuar me forcë sulmin e 24 shtatorit në Banjskë të Zveçanit. Ai ka bërë thirrje për vazhdimin e dialogut mes Kosovës dhe Serbisë nën ndërmjetësimin e BE-së, për të arritur një zgjidhje paqësore të konfliktit.
Në një intervistë për gazetën italiane “Messaggero Veneto”, ai ka theksuar se Italia e konsideron sulmin në Banjskë si një akt shumë serioz, që nuk duhet të përsëritet. Ai ka shtuar se tani prioritet është rinisja e procesit politik, për të shmangur tensionet apo incidentet e mëtejshme.
“Ky ishte mesazhi kryesor që së bashku me BE-në, Gjermaninë, Francën dhe Shtetet e Bashkuara, sollëm në Beograd dhe Prishtinë më 21 tetor. Italia do të vazhdojë të bëjë pjesën e saj për të siguruar që dialogu të vazhdojë në mënyrë konstruktive dhe që përplasjet e mëtejshme të parandalohen falë punës së misionit NATO-KFOR, ku vendi ynë është një nga kontribuuesit kryesorë”, ka deklaruar ministri Tajani.
BE-ja ka bërë thirrje për qetësi dhe bashkëpunim, duke shprehur gatishmërinë e saj për të ndërmjetësuar dialogun mes dy palëve. (politiko.makdomen.net)