Kryetari i Bashkimit Demokratik për Integrim, Ali Ahmeti ishte sot pjesëmarrës në përurimin e hapësirave të reja të BDI-së në Degën e Kumanovës.
Ahmeti në fjalimin e tij para të pranishmëve tha se BDI nuk mposhtet vetëm sepse dëshiron dikush, sepse rruga mbi 20 vjeçare e partisë është e shtruar me sakrifica, mund dhe ideale kombëtare.
Ahmeti tha se me BDI, shqiptarët u faktorizuan dhe tashmë nuk shihen si të pafuqishëm, mirëpo janë popull vendimarrës në Maqedoninë e Veriut.
“Rrugëtimi im politik nuk ka qenë I lehtë, gjithmonë ka qenë me përgjegjësi të mëdha, rezistencë, luftë e deri tek ideja për ndarjen e Maqedonisë së Veriut. Projekti i ndarjes na e humbte Shkupin e Bekim Nezirit, na e humbte Kumanovën, Ohrin, Strugën e Manastirin, Prilepin e Velesin… ndaj zgjodhëm Marrëveshjen e Ohrit, rrugën drejt përparimit dhe ardhmërisë, duke u avansuar gjithmonë. Ne jemi shqiptarë kudo që jemi dhe padrejtësisht na kanë nda, ndaj nuk duhet të kemi ndarje e kufi mes nesh. BDI ka dy në bazamentin e saj dy qëllime, mos t’I harrojmë dëshmorët, të nderojmë dhe jetësojmë amanetin e tyre dhe e dyta të bashkojmë shqiptarët. Vite kaluan dhe ne vazhdimisht jemi sulmuar për idealet tona, mirëpo me shpifje dhe urrejtje nuk shuhet BDI-ja, sepse BDI është investim kombëtar dhe kush de kundër, disfatën e kanë të sigurtë. 22 vjet kemi investu në Kuadro profesionale, e si mos të behët zemra mal kur më presin gjenerata të reja specialistësh e lloj lloj profesionistësh të tjerë, ndaj për të ruajtur këtë pasuri gjeneratash ne bëjmë ftesë për bashkim ne Frontin Europian, që njerëzit mos të na ikin por të rrinë në vendin e tyre dhe të jetojmë mirë këtu në Maqedoninë e Veriut”, deklaroi Ahmeti.