Një grua nga Drenica ka treguar për RTV Dukagjinin se si është dhunuar seksualisht nga kriminelët serbë gjatë luftës në Kosovë, bashkë me fëmijët e saj. Ajo ka treguar sesi e ka përjetuar ferrin në një fushë ku kryheshin edhe vrasje masive të të moshuarve. Ajo tha se edhe pas luftës ka vuajtur nga trauma dhe ka tentuar të bëjë vetëvrasje.
Gruaja, e cila kërkoi të mbetet anonime, foli për herë të parë për dhunën që iu bë gjatë kohës kur ishte 30 vjeçe. Ajo ishte në mesin e dhjetëra grave të tjera që u përdhunuan atë ditë në një fushë në rajonin e Drenicës. Ajo tha se fëmijët e saj, një djalë dhe një vajzë, gjithashtu kanë qenë viktima të përdhunimit nga serbët.
Ajo ka treguar se si u godit me thikë nga kriminelët që mendonin se nuk do të mbijetonte. Ajo tha se u zgjua nga klithmat e fëmijëve të saj, të cilët ishin përdhunuar para syve të saj. Pastaj ajo është zhvendosur nga zona ku janë kryer krimet në një objekt, ku është trajtuar me pabarazi dhe shkelje.
Ajo tha se përveç tmerrit personal që kanë përjetuar, kanë qenë dëshmitarë edhe gjatë vrasjes së 20 pleqve nga forcat serbe. Ajo ka thënë se me përfundimin e luftës erdhi dhe koha të kthehet në shtëpi, në krah të bashkëshortit, tek i cili ka gjetur edhe mbështetje.
Megjithatë, ajo tha se edhe gratë e tjera kishin një problem të madh, si ta përballonin jetën pas asaj që kishin përjetuar. Disa prej tyre kanë tentuar të bëjnë vetëvrasje ose kanë vuajtur nga depresioni dhe izolimi.
Tani e disa vite ajo trajtohet në Qendrën Kosovare për Rehabilitimin e të Mbijetuarve të Torturës. Ajo mblodhi forcat për t’ia treguar historinë e saj një mediumi për herë të parë, duke shpresuar të ndihmonte gratë e tjera që kanë kaluar të njëjtën gjë. Ajo u bëri thirrje grave që të mos i mbajnë historitë e tyre për vete, por të jenë dëshmitare të gjalla të historisë së vendit në sytë e botës. (politiko.makdomen.net)