Kryeministri i Shqipërisë Edi Rama, po merr pjesë në organizimin e Komisioni Evropian të quajtur “Global Gateway”.
Në fjalimin e tij në Bruksel, Rama tha se Shqipëria dhe Ballkani Perëndimor, duhet të jenë pjesë e pandarë e programeve evropiane.
Ai tha se ‘martesa’ me Bashkimin Evropian është më e vështira, por që ia vlen.
“Unë kam pasur disa dështime në martesë, por pasi gjeta atë të duhurën e duke qenë i lumtur me të, unë besoj që kjo do të ndodhë edhe me Shqipërinë dhe të tjerët kur të martohen me BE-në. Dua që t’ju lë duke ju thënë një fakt të vogël sepse dua që ta dini që e gjithë buzëqeshja ime, e gjithë dashuria ime, gjithçkaja ime për Evropën dhe Bashkimin Evropian është pa kushte, por nuk është e pa mend”, tha ai.
Kreu i qeverisë shqiptare tha se vendi i tij rrethohet nga kufijtë e BE-së marrin shumëfish më pak financime sesa fqinjët që janë.
“Marrin nga 4 mijë e 517 euro për frymë nga vetë Bashkimi Evropian. Ajo çfarë marrim ne, E-në, pa B-në, vetëm 138 euro për frymë. Është një hendek shumë i madh që ne e mbushim me dashuri, që e mbushim me shpresë, që e mbushim me ambicie, që e mbushim me ide shumë të qartë që nuk ka asgjë më të mirë që mund të lëmë pas për fëmijët tanë, por shpresoj fort që ajo çfarë Presidentja e Komisionit dhe ky Komision po punojnë fort për të bërë, do t’ia dalin me sukses sepse në fund të fundit, fëmijët tanë nuk duhet të trashëgojnë vetëm testamentin e dashurisë, por edhe provën që kjo martesë është e vetmja që ia vlen të kesh”, tha Rama në fjalimin e tij.