Shefi i diplomacisë, Bujar Osmani, shprehet optimist se nëse miratohen ndryshimet kushtetuese të përcaktuara në kornizën negociuese, RMV-ja do të vazhdojë rrugëtimin e saj evropian së bashku me Shqipërinë.
I pyetur nëse është e mundur që vendi të ndahet nga Shqipëria në këtë proces, pas deklaratës së presidentit të Francës, Emanuel Makron, i cili në Tiranë saktësoi se do të mbështesë Shqipërinë, pa përmendur edhe Maqedoninë e Veriut, Osmani u përgjigj se nuk duhet nxjerrë konkluzione të tilla, se RMV-ja mund të ndahet nga rruga e përbashkët evropiane me Shqipërinë, pasi që bëhet fjalë për një vizitë dypalëshe në Shqipëri. Vendi ynë duhet përfunduar me sukses detyrën e shtëpisë, porositi Osmani.
“Nëse do të ketë një ndarje, duhet të pyesni partinë opozitare. Topi është në fushën tonë dhe ndryshimet kushtetuese janë momenti që do të vendosë nëse do të ketë ndarje apo vazhdim të negociatave me BE-në, bashkë me Shqipërinë. Është çështje e opozitës tani për tani dhe për një kohë të shkurtër do të jetë për të gjithë ne.”, – deklaroi ministri i Punëve të Jashtme, Bujar Osmani.
Nuk duhet të zvarritet akoma më shumë procesin eurointegrues të RMV-së dhe të vendeve të Ballkanit Perëndimor, vlerësojnë ish-zëvendëskryeministri për Çështje Evropiane, Vasko Naumovski, dhe profesori universitar, Goran Iliq.
Siguria e BE-së dhe e rajonit është e cenuar, andaj askush nuk ka rrugëdalje tjetër, përveç integrimit në BE, thanë ata duke u bërë thirrje faktorit politik në vend, që të gjithë të kontribuojnë pozitivisht për të vazhduar procesin eurointegrues.
“Qëllimi i diskutimit tonë është që të ngritin vëmendjen e faktorit dhe diplomacisë tonë ndërkombëtare për nevojën e zgjerimit të mëtejshëm në kushte kur siguria në Evropë është seriozisht e rrezikuar nga të gjitha anët. Vlerësojmë se mënyra e vetme dhe më e sigurt për stabilizimin e gjithë rajonit është përmes integrimit të tërësishëm të vendeve të rajonit në BE.”, – theksoi ish-zëvendëskryeministri për Çështje Evropiane, Vasko Naumovski.
“Tani nuk duhet të lejohet që të zvarritet procesi i integrimit tonë dhe të vendeve tjera të Ballkanit Perëndimor. Ai duhet të ndodh sa më parë, sepse këtë gjë tani e kërkojnë edhe rrethanat gjeopolitike, sepse duhet të kuptojmë se edhe BE-ja paraqet prodhim të gjeopolitikës, se zgjerimi i BE-së si proces, në thelb paraqet gjeopolitikë dhe se kjo çështje nuk është vetëm çështje e thjesht e burokracisë.”, – u shpreh profesori universitar, Goran Iliq.
Nga Ministria e Punëve të Jashtme vlerësojnë se është e nevojshme që vendet e Ballkanit Perëndimor, të cilët pretendojnë të hapin negociatat me BE-në, të kenë qasje më të mëdha deri tek fondet evropiane paraqitëse dhe tregut të përbashkët para se ata të bëhen anëtarë të plotë të BE-së.