Për fat të keq, skandali që ka ndodhur në Klinikën e onkologjisë nxjerr në sipërfaqe se krimi dhe korrupsioni kanë depërtuar thellë në çdo pore të shoqërisë, thonë nga Partia Demokratike Evropiane e udhëhequr nga Arjanit Hoxha.
Nga PDE, i inkurajojnë institucionet e rendit dhe drejtësisë që të kryejnë me seriozitet hetimet dhe përgjegjësit e këtij akti të shëmtuar dhe kriminal të marrin dënimin e duhur.
“Tani më shumë se asnjëhere duhet të fillohet betejë e pa komromis me krimin e organizuar dhe korrupsionin, fenomene këto që për çdo ditë humbin besimin e qytetarëve në institucionet e vendit dhe ndikojnë në largimin masiv të tyre nga vendi. Koha e personave të paprekshëm dhe të mbrojtur nga institucionet duhet të merr fund, ndërsa rasti me Klinikën e onkologjisë është alrami i fundit që institucionet të veprojnë dhe fajtorët të marrin dënimin maksimal”, thuhet në reagimin e PDE-së.
Sipas tyre, thënia se “korrupsioni vret” si asnjëherë më parë dëshmohet me këtë rast.
“Vlersojmë se ky është alarmi i fundit për të dëshmuar në vepër se krimi dhe korrupsioni nuk do kalojnë pa u dënuar. Besimi në institucionet të të gjitha sferave mund të rikthehet vetëm duke luftuar fenomenet devijante, përndryshe çdo deklarim verbal për aspirata drejt vlerave evropianë është i barazvlefshëm me zero nëse nuk fillohet seriozisht të punohet në parandalimin e këtij “kanceri” të quajtur krim dhe korrupsion i cili për fat të keq ka depërtuar në të gjitha nivelet e shoqerisë”, vlerësojnë nga Partia Demokratike Evropiane.