Biden kërkon nga Kongresi të aprovohet shitja e avionëve F-16 në Turqi pas anëtarësimit të Suedisë në NATO

Presidenti amerikan Joe Biden i ka njoftuar anëtarët e lartë republikanë dhe demokratë të komiteteve të Politikës së Jashtme të Senatit dhe Dhomës së Përfaqësuesve për qëllimin e tij për të nisur procedurën formale për shitjen e avionëve F-16 të kompanisë Lockheed Martin, pasi Ankara të plotësojë procesin e pranimit të Suedisë në NATO.

Në letrën e tij, Presidenti Biden i ka bërë thirrje Kongresit të japë miratimin e tij “pa vonesë”, tha një zyrtar amerikan. Më parë gjatë ditës, Zyra e Shtëpisë së Bardhë i ka dërguar një letër anëtarëve të Kongresit duke kërkuar aprovimin e shitjes prej 20 miliardë dollarësh të avionëve F-16 dhe pjesëve rezervë në Turqi, raportoi agjencia e lajmeve Reuters, duke cituar katër burime të informuara për letrën.

Parlamenti i Turqisë miratoi të martën kërkesën e Suedisë për t’u bashkuar me NATO-n, duke hequr qafe pas 20 muajsh vonesë një pengesë të rëndësishme për zgjerimin e aleancës ushtarake perëndimore.

Burimet thanë se letra ishte dërguar gjatë ditës dhe se administrata e Biden ende nuk kishte bërë njoftimin zyrtar për planet për shitjen.

Vonimi i Turqisë për të dhënë miratimin e tij kishte qenë një pengesë e madhe për të marrë aprovimin e Kongresit për marrëveshjen e avionëve luftarakë. Ligjvënësit kishin thënë se po prisnin që Turqia të jepte miratimin e tij për pranimin e Suedisë në NATO, duke përfshirë nënshkrimin e Presidentit turk Erdogan para se të vendosnin nëse do ta aprovonin shitjen.

Departamenti i Shtetit i kërkoi gjithashtu Ankarasë gjatë ditës të përfundonte zyrtarisht pranimin e Suedisë në NATO. Për ta bërë këtë, Presidenti Erdogan duhet të nënshkruajë ligjin, i cili më pas publikohet në Gazetën Zyrtare të Turqisë. Instrumenti i pranimit për Suedinë duhet të dërgohet gjithashtu në Uashington.

Departamenti i Shtetit nuk dha një afat kohor të saktë për procedurën zyrtare të njoftimit për shitjen e avionëve F-16.

Suedia dhe Finlanda aplikuan për t’u bërë pjesë e NATO-s pasi Rusia goditi Ukrainën në shkurt 2022. Ndërsa pranimi i Finlandës u krye vitin e shkuar, kërkesa e Suedisë ishte bllokuar nga Turqia dhe Hungaria.

Të gjitha vendet anëtare të NATO-s duhet të japin miratimin e tyre për aplikimet nga vendet që duan t’i bashkohen aleancës. Kur Suedia dhe Finlanda kërkuan të anëtarësohen, Turqia bëri kundërshtime mbi atë që quajti mbrojtjen nga këto dy vende për grupet që Turqia i konsideron terroriste. (bild.mk)