Në Brugun e Sigurisë së Lartë, ku mbahen tre të akuzuarit për vrasjen e Liridona Ademajt, ka ndodhur një incident. Sipas Drejtorit të Shërbimit Korrektues, Ismail Dibrani, Granit Plava, i cili dyshohet se ishte ai që e ekzekutoi viktimën me urdhër të bashkëshortit të saj, Naim Murselit, ka qenë objektiv i një tentim-sulmi nga një person tjetër në burg. Plava gjithashtu ka dëmtuar një batanije, por nuk ka tentuar të vetëvritet, tha Dibrani.
Në një deklaratë për “Gazetën Express” Dibrani njoftoi se do të krijojë një komision hetimor për të zbardhur rrethanat e këtij incidenti. Ai tha se do të nxjerrri rezultate konkrete për këtë rast.
“Për të gjitha këto ne do ta formojmë komisionin hetimor dhe do të dalim me rezultate konkrete”, tha ai.
Të tre të akuzuarit, Naim Murseli, Granit Plava dhe Kushtrim Kokalla, janë në paraburgim prej një jave, pasi Gjykata Themelore e Prishtinës ka vendosur se ka dyshim të bazuar mirë se kanë kryer vrasjen e rëndë në bashkëkryerje. Sipas Gjykatës, Naim Murseli kishte planifikuar të vriste bashkëshorten e tij “në mënyrë dinake” dhe kishte përdorur Granit Plavën si doras, të cilin e kishte pajisur me armë. Kushtrim Kokalla akuzohet se kishte marrëveshje me ta për të kryer krimin. (politiko.makdomen.net)