Një ditë pas arrestimit të tre të dyshuarëve për vrasjen e Liridonës në Prishtinë, Presidentja e Republikës së Kosovës, Vjosa Osmani, ka reaguar me një deklaratë të fortë. Ajo e ka quajtur këtë krim si montruoz dhe ka kërkuar që drejtësia të bëjë punën e saj dhe të dënojë autorët me ashpërsinë e ligjit. Ajo ka theksuar se femicidi është një shprehje e pabarazisë dhe dhunës që vuajnë gratë dhe një turp për shoqërinë tonë.
Presidentja Osmani ka shkruar në rrjetet sociale se është e tronditur nga krimi i rëndë që mori jetën e Liridonës, e cila u qëllua me armë zjarri nga një vrasës i paguar. Ajo ka thënë se ky krim kërkon veprim të shpejtë dhe vendimtar për t’u siguruar që drejtësia të mbizotërojë dhe që autorët ta marrin dënimin. Ajo ka shtuar se është nevojë urgjente që të forcohet zbatimi i ligjit dhe kryerësit e krimeve të tilla të llahtarshme të përballen me dënimet më të ashpra të parapara me ligj.
“Femicidi është dëshmi rrënqethëse që shpërfaq pabarazinë e rrënjosur thellë dhe dhunën me të cilën përballen gratë. Është një rrëfim tragjik i jetëve të shkurtuara brutalisht vetëm për shkak të gjinisë. Humbja e jetëve të grave nga duart e burrave është një njollë në ndërgjegjen tonë kolektive”, ka shkruar Osmani.
Ndërkohë, nesër do të mbahet seanca gjyqësore për tre të dyshuarit për këtë rast, Naim Murseli, Granit Plava dhe Kushtrim Kokalla. Murseli, i cili ishte bashkëshorti i viktimës, dyshohet se e ka porositur vrasjen e saj, duke e paguar 30 mijë euro Plavën, i cili e kreu krimin. Kokalla, i cili është nipi i Murselit dhe pjesëtar i FSK-së, dyshohet se ka pasur një rol në këtë rast. (politiko.makdomen.net)