Macron dhe Begaj diskutojnë për integrimin evropian dhe dialogun Kosovë-Serbi

Presidenti francez, Emmanuel Macron, u prit me nderime nga homologu i tij shqiptar, Bajram Begaj, në ditën e dytë të vizitës së tij në Tiranë.

Përgjatë takimit, dy presidentët biseduan për procesin e integrimit evropian të Shqipërisë dhe zhvillimet në rajonin e Ballkanit Perëndimor.

Presidenti Begaj shprehu mirënjohjen për mbështetjen e vyer që Franca dhe Presidenti Macron i kanë dhënë e i japin Shqipërisë dhe vendeve të tjera të rajonit për t’u bërë pjesë e Bashkimit Evropian, nëpërmjet Procesit të Berlinit.

Ai gjithashtu vlerësoi iniciativën e ndërmarrë një vit më parë nga Presidenti Macron, për lançimin e Komunitetit Politik Evropian, si një iniciativë që i jep më shumë mundësi Shqipërisë dhe vendeve të tjera kandidate në Bashkimin Evropian, të kenë më shumë akses në projektet e BE-së, veçanërisht në fushën e shkëmbimeve universitare dhe studentore.

Presidenti Begaj falenderoi Macron, për kontributin në mbështetje të dialogut midis Kosovës dhe Serbisë, veçanërisht përmes planit të quajtur franko-gjerman, duke nënvizuar nevojën e mbështetjes së mëtejshme të këtij dialogu, por edhe të nevojës së dënimit dhe të çkurajimit të akteve të dhunshme dhe të provokative në komunat e Veriut të Kosovës.

“Kosova është vend sovran dhe i pavarur, dhe akte terroriste si ajo e Banjskës në Zveçan (24 shtator 2023), janë të papranueshme e të dënueshme për sigurinë e saj, por edhe të rajonit e të mbarë kontinentit evropian”, tha Presidenti Begaj. (politiko.makdomen.net)