Parlamenti Evropian do të miratojë një rezolutë për Kosovën dhe Serbinë

Parlamenti Evropian (PE) është duke përgatitur një rezolutë të veçantë për zhvillimet në Kosovë dhe për marrëdhëniet Prishtinë-Beograd, në të cilën do të kërkohen masa ndëshkuese ndaj Serbisë.

Sipas burimeve brenda PE-së, rezoluta do të bazohet në diskutimin e zhvilluar dy javë më parë në PE për situatën në Kosovë, ku është bërë ftesa që Kosova dhe Serbia t’i kthehen dialogut të ndërmjetësuar nga Brukseli. Rezoluta do të kërkojë gjithashtu hetim të plotë për sulmin ndaj policisë së Kosovës më 24 shtator në fshatin Banjské të Zveçanit, për të cilin Kosova ka akuzuar Serbinë.

Rezoluta do të vendoset në procedurë të përshpejtuar dhe pritet të miratohet më 19 tetor gjatë seancës plenare të PE. Nga ana tjetër, vendimet për sanksione klasike ndaj Serbisë merren nga Këshilli i BE-së, ndërsa Komisioni Evropian ka kompetencat për të vendosur masa ndëshkuese, siç bëri ndaj Kosovës.

Ideja për një rezolutë të tillë në PE është paraqitur nga deputeti socialdemokrat nga Kroacia Tonino Piculla dhe ka marrë miratimin e duhur nga grupet politike. Tani pritet që secili grup politik të paraqesë draftin e vet për rezolutë. Pas kësaj do të caktohet një ekip i cili do të koordinojë për arritjen e një kompromisi për amendamentet e rezolutës. Kur grupet të arrijnë marrëveshje për tekstin e përbashkët të rezolutës, atëherë ajo do të hidhet në votim në seancën plenare të PE. (politiko.makdomen.net)