Ekspozita me punimet e qeramikës, e cila u hap mbrëmë në Qendrën për Kulturë në Kërçovë, prezenton vlerat e çmueshme të trashëgimisë tonë kulturore dhe ajo vjen si rezultat i një bashkëpunimi 9 vjeçar të Qendrës për Kulturë dhe nxënësve të shkollave të mesme të Kërçovës “Drita” dhe “Mirko Mileski”, të cilët me punimet e tyre të realizuara në punishten e fashatit tradicional të qeramikës në Vraneshnicë, na prezentojnë mjeshtërinë e punimeve nga qeramika, si pjata, vazo, ibrikë dhe skulptura të lira kreative të punuara në rrotën e poçarit.
“Ndjehem vërtetë e lumtur që ndodhem sonte këtu në një jubile të rëndësishëm të Qendrës për Kulturë, duke shpresuar se do të jemi përsëri bashkë në shënimin e 10 vjetorit të këtij projekti, i cili ka për qëllim t’i bashkojë të rinjtë përmes njohjes së trashëgimisë kulturore”, u shpreh ministrja e Kulturës, Bisera Konstadinovska Stojçeska.
Ndërkaq, drejtori i Qendrës për Kulturë, Mazllam Osmani i falënderoi të gjithë ata që i dhanë mbështetje këtij projekti që realizohet në frymën e bashkëpunimit multikulturor dhe potencoi se:
“Ky është njëri ndër projektet kryesore i cili me mbështetjen e Ministrisë së Kulturës realizohet në Kërçovë, falë kontributit të ideatorit të projektit, poçarit Sllobodan Stoleski nga fshati Vraneshnicë, nxënësve të shkollave tona dhe mentorëve të tyre, të cilët e realizuan këtë ekspozitë me punime të qeramikës në mënyrën tradicionale”, theksoi drejtori i qendrës për kulturë në Kërçovë, Mazllam Osmani.
Për nxënësit e shkollave të mesme “Drita” dhe “Mirko Mileski”, Qendra për Kulturë e Kërçovës ndau mirënjohje për realizimin e shkëlqyer të këtij projekti, i cili vitin e ardhshëm shënon vitin jubilar të organizimit.