Të gjithë të bashkohemi rreth frontit evropian dhe të luftojmë agjendën e VMRO-DPMNE-së, bëri thirrje kryeministri Dimitar Kovaçevski, sipas të cilit agjenda e opozitës është anti-evropiane dhe shpie në izolim. Ai tha se bllokimi i rrugës evropiane është bllokim i identitetit të pranuar, fondeve dhe vlerave evropiane.
“Ta realizojmë ëndrën shekullore të të gjithë luftëtarëve për pavarësinë e Maqedonisë, e ajo është të ndërtojmë shtet i cili është anëtarë i BE-së, anëtare e NATO-së të cilin e bëmë, edhe përskaj të gjitha kundërshtimeve të atyre të cilët kundërshtojnë integrimin në BE. Qytetarët duhet ta përkrahin këtë koncept të unitetit të shtetit, i cili do të rezultojë me shtet si anëtar i plotfuqishëm bë BE, si shtet ku kemi prosperitet ekonomik, të drejtë sociale dhe sundim të demokracisë dhe ligjit”, u shpreh kryeministri Dimitar Kovaçevski, përcjell Politiko.makdomen.net
Nga VMRO-DPMNE mbeten në qëndrimin se ndryshime kushtetuese nën diktimin bullgar nuk do të ketë. Sipas kryetarit të VMRO-së Hristijan Mickoski, fakti që Dimitar Kovaçevski ende lë hapësirë dhe është optimist se do të mblidhen dy të tretat për ndryshimin e Kushtetutës është vetëm politikë.
“Edhe VMRO-DPMNE kur të vije në qeveri, nëse nuk do të ketë ndryshim të rrethanave, nëse nuk shohim përparim, I cili qoftë pak do të jetë simetrik, sepse tani është krejtësisht asimetrik, është tërësisht në drejtim të kërkesave bullgare, nuk do të ketë ndryshime kushtetuese. Për mua ai optimizëm i tij, është i politikanit, sepse në këtë mënyrë do të mobilizojë edhe ata pak persona që mbetën në selinë e LSDM-së, se ja ato ndryshime do të ndodhin”, theksoi kryetari i VMRO-DPMNE-së, Hristijan Mickoski.
Përndryshe, afati fillestar për ndryshimet kushtetuese ishte nëntori, kur duhet të përfundojë procesi i shqyrtimit dhe të mbahet konferenca e dytë ndërqeveritare, e cila do të nisë negociatat për kapitujt.