Në foton e mëposhtme është 17-vjeçari i cili humbi jetën tragjikisht orët e para të kësaj të Shtune në lokalin ku punonte si ndihmës kamarier.
Gazetarja e Klan News Monika Xhani e cila ka siguruar foton e të ndjerit bën me dije se bëhet fjalë për Antonio Delilajn.
Ishte këputja e kavos së ashensorit në lokalin ku i riu punonte ajo që shkaktoi ngjarjen e rëndë.
Sipas policisë, në pranga është vënë montuesi i ashensorit, 43 vjeçari Lulzim Allkushi ndërsa është ende në kërkim pronari i “Orange Club” Spiro Iliadhi.
“Specialistët për Hetimin e Krimeve në Komisariatin e Policisë Sarandë arrestuan në flagrancë për veprën penale ”Shkelja e rregullave të mbrojtjes në punë”, shtetasin L.A., 43 vjeç, banues në Sarandë si dhe shpallën në kërkim shtetasin S.I., 37 vjeç, banues në Sarandë.
Arrestimi i 43-vjeçarit dhe shpallja në kërkim e 37-vjeçarit u bë pasi:
Rreth orës 01:15 minuta të mëngjesit të sotëm, në lagjen “Nr. 1″, Sarandë, në lokalin në pronësi të shtetasit S. I., është këputur kavoja e ashensorit që përdorej kryesisht për furnizimin e lokalit, duke zënë poshtë shtetasin A. D., 17 vjeç, (ndihmës/kamarier në këtë lokal). Për pasojë, 17-vjeçari ka humbur jetën.
Nga veprimet hetimore të kryera ka rezultuar se 43-vjeçari i arrestuar kishte montuar ashensorin e lokalit ndërsa 37-vjeçari i shpallur në kërkim është pronari i lokalit dhe vijon puna intensive për kapjen e tij.
Materialet i kaluan Prokurorisë për veprime të mëtejshme për veprën penale “Shkelja e rregullave të mbrojtjes në punë”, njoftoi policia më herët./tvklan.al