Kryetari i Aleancës për Ardhmërinë e Kosovës, Ramush Haradinaj, ka thënë se Kurti mund të ketë ritmin dhe orën e tij, por Kosova nuk ka kohë për të humbur. Ai ka thënë se është momenti i fundit kur kryeministri duhet t’i lexojë drejt mesazhet e partnerëve dhe të shmanget nga temat acaruese. “Është koha e fundit që Kurti t’i lexojë drejtë porositë e miqve të palëkundur të Republikës së Kosovës, të Komisionit të Dhomës së Përfaqësuesve për Marrëdhëniet me Jashtë, të ofruara me dashamirësinë dhe mirëkuptimin e aleatëve dhe partnerëve në dëshminë e fundit të Escobar”. “Është koha e fundit që Kurti të largohet nga temat tensionuese dhe destruktive, ku vegjetojnë liderët pro-rus, sikurse janë dhe do të vazhdojnë të mbesin Dodik dhe Vuçiq”, është shprehur Haradinaj. Ai ka shtuar se Shtetet e Bashkuara edhe këtë herë po inkurajojnë Kosovën t’u qëndrojë zotimeve dhe t’i hapë rrugë afirmimit ndërkombëtar.