Gjatë një vizitë zyrtare në Slloveni, Presidenti Bajram Begaj riktheu sërish vëmendjen te nevoja e dialogut mes Prishtinës dhe Beogradit, teksa i bëri thirrje vendeve të shpenzojnë energjitë e tyre për të ndihmuar në zgjidhjen e tensioneve në veri të Kosovës, duke theksuar rëndësinë që ka stabiliteti në rajonin e Ballkanit Perëndimor.
“Stabiliteti nuk jepet falas, duhet punuar për ta pasur dhe për fatin e keq situata në veriun e Kosovës, situata e kohëve të fundit na tregoi që stabiliteti është shumë i rëndësishëm. Politika e eskalimit për të deeskaluar është një politikë e ditës, e cila i shërben politikanëve për të fituar zgjedhjet e radhës, por kurrsesi nuk i shërben prosperitetit të vendeve të përfshira. Në vend që të harxhojmë energjitë tona për të deeskaluar situatën e eskaluar, të harxhojmë energjitë tona për të punuar për të implementuar atë dakordësi publike që liderat e Kosovës dhe të Serbisë kanë pranuar në Bruksel dhe anekset e miratuara në Ohër”, tha Begaj.
Të njëjtin qëndrim ndau edhe homologia e tij, Presidentja e Sllovenisë Pirc Musar për tensionet në veri të Kosovës, teksa i bëri thirrje Beogradit të zbatojë marrëveshjen duke mos penguar Kosovën në institucionet ndërkombëtare: “Një retorikë shumë e ashpër nga të dyja palët, vetëm dialogu mund të zgjidhë çështjet. Të dy liderët të ulen e dialogojnë dhe duhet të respektohen marrëveshjet e nënshkruara dhe premtimi i Serbisë që nuk do ta pengojë Kosovën në institucionet ndërkombëtare”.
Sllovenia mbështet vendet e Ballkanit Perëndimor në përafrimin e tyre drejt rrugës së Bashkimit Europain pohoi Presidentja Musar, teksa kërkoi nga BE përshpejtimin e pranimit të atyre vendeve që avancojnë në kriteret e vendosura.