Drejtori i Shërbimit Inteligjent serb, Aleksandar Vulin, të martën është bërë pjesë e listës së personave të sanksionuar nga Shtetet e Bashkuara të Amerikës.
Në njoftimin nga Thesari amerikan, thuhet se Vulin kishte shfrytëzuar pozicionin e tij për të lehtësuar aktivitetet politike dhe interesat personale.
Thuhet gjithashtu se ai kishte lehtësuar aktivitetet ruse në Serbi dhe rajon, duke cenuar stabilitetin në Ballkanin Perëndimor.
Sipas Departamentit Amerikan të Thesarit, kreu i Inteligjencës serbe ishte po ashtu ishte përfshirë në një rrjet të trafikut të drogës.
E lidhur me këtë ka reaguar Ambasada e Shteteve të Bashkuara të Amerikës në Beograd.
Në reagim ambasada thekson se SHBA-të janë të palëkundur t’i ekspozojnë ata që janë të përfshira në afera korruptive.
“Ky veprim nuk ka për qëllim asnjë nga institucionet e Republikës së Serbisë. SHBA është e palëkundur në përpjekjet e saj për të ekspozuar ata që janë të përfshirë në aktivitete korruptive dhe destabilizuese që minojnë sundimin e ligjit në Ballkanin Perëndimor dhe thellojnë ndikimin malinj të Rusisë në rajon. SHBA vazhdon të mbështesë qytetarët e Serbisë në rrugën e reformimit të sistemit gjyqësor, luftës kundër korrupsionit dhe krijimit të një të ardhmeje më të mirë”, thekson Ambasada e ShBA-së.