Ministri i Arsimit dhe Shkencës, Jeton Shaqiri në një prononcim për indeks.mk ka njoftuar se në vendin tonë për momentin është duke u punuar në rikonstruimin e 44 objekteve shkollore.
Shaqiri gjithashtu njoftoi se 20 shkolla po rikonstuohen me mjetet vetanake të ministrisë.
Duke folur për shkollat në Komunën e Çairit, Shaqiri tha se për këto projekte që janë duke u realizuar Komuna e Çairit ka dorëzuar vetëm aplikimin dhe asgjë tjetër, njofton indeks.mk.
Shtoi se rikonstruimi i shkollës fillore, Vasill Gllavinov kap vlerën e 28 milionë denarëve, të siguruara nga mjetet buxhetore të MASH.
Paralajmëroi edhe investime të rëndësishme në shkollën “Liria” po edhe në dy shkolla tjera të Komunës së Çairit.
Sipas Shaqirit, për rikonstruimin e shkollave, mjete duhet të ndajnë edhe komunat, sepse siç nënvizoi, me decentralizim, arsimi është në bashkëmenaxhim.
Ministri Jeton Shaqiri tha se janë siguruar mjetet edhe për gjimnazin e Kumanovës, “Sami Frashëri” dhe për këtë pritet vetëm projekti që duhet dorëzuar në Ministrinë e Arsimit dhe Shkencës nga ana e Komunës së Kumanovës, njofton indeks.mk
Foli edhe për rikonstruimin e shkollës “Vllezërit Milladinov” në qytetin e Strugës.
Shaqiri tha se pas Bllacës, pritet edhe përfundimi i shkollës fillore në Vizbeg dhe zgjidhja e një problemi afatgjatë. Shtoi se projekti i Vizbegut ka pasur edhe mbështetjen e zëvendëskryeministritt të parë, Artan Grubi.
Njoftoi se me ndryshimin e programit në Qeveri do të zgjidhet edhe problemi me shkollën në fshatin Sellcë të Tetovës.
Në fund, Shaqiri dha edhe lajme të mira për shkollat fillore në Jabollçishtë të Poshtme dhe të Epërme, po edhe për shkollat tjera në Komunën e Çashkës dhe Velesit. /indeks.mk/