Boçvarski: Me ndërtimin e Korridorit 8 bëhemi rrugë e pashmangshme transporti në rajon

Ministri i Transportit dhe Lidhjeve, Bllagoj Boçvarski, i cili ndodhet në një vizitë pune në Mal të Zi, si dhe po merr pjesë në konferencën ministrore kushtuar lidhjes së vendeve të Ballkanit Perëndimor, organizuar nga Sekretariati i Komunitetit të Transportit dhe CEFTA, mes tjerash ka folur edhe për rëndësinë e lidhjes rajonale, me theks të veçantë në Korridorin 8 rrugor dhe hekurudhor dhe projektet që janë duke u realizuar në të, raporton Indeks.mk

“Sot nënshkrova Marrëveshjen ndërmjet Maqedonisë së Veriut dhe Bashkimit Evropian për përfshirjen e këtij Korridori shumë domethënës në aksin lindje-perëndim në hartën e korridoreve kryesore evropiane. Prandaj, është detyrimi ynë që të vazhdojmë me ndërtimin e Korridorit 8 rrugor dhe hekurudhor, për ta sjellë atë në nivelin e një lidhjeje rrugore moderne, cilësore dhe të sigurt, me të cilën do të tregojmë në veprim se këto politika nuk janë vetëm politika në letër, por politika që ne i realizojmë në terren. Për Republikën e Maqedonisë së Veriut, ky është një vendim strategjik i rëndësishëm i Bashkimit Evropian, me të cilin tashmë jemi të pozicionuar në mënyrë qendrore si udhëkryq në rajonin e dy korridoreve kryesore evropiane, në korridoret 8 dhe 10”, tha ministri Boçvarski, përcjell Indeks.mk

Sipas tij, zhvillimi i Korridorit 8 përgjatë aksit lindje-perëndim është një instrument i domosdoshëm ekonomiko-politik që do të ndihmojë rajonin në përmirësimin e lidhjes dhe stabilitetit rajonal.(Indeks.mk)