Një deklaratë e Gabriell Eskobarit për Zërin e Amerikës, mund ta ketë lënë “pa tekst” opozitën në Maqedoni, sepse iu drejtua me një porosi që “e çarmatos” nga çdo argumentim. Sepse opozitës, nëse e lexojmë midis rreshtash, nuk i thotë të heq dorë nga të kritikuarit e qeverisë, por të mos heqë dorë nga rruga evroatlantike e vendit!
“Ne nuk kërkojmë nga opozita ta mbështesë kryeministrin. Kërkojmë nga opozita të mbështesë rrugën euroatlantike të Maqedonisë së Veriut. Kjo është marrëveshja më e mirë që kemi marrë. Kjo është e arsyeshme, mendoj tani për tani dhe duhet të vazhdojmë përpara sa më shpejt të jetë e mundur. Prandaj, shpresoj se të gjitha palët e spektrit politik i mbështesin ndryshimet e nevojshme në mënyrë që të mund të ecim përpara në avancimin e kandidaturës së Maqedonisë së Veriut”, ishte deklarata e zëvendësndihmës sekretarit amerikan të shtetit për Ballkanin Perëndimor, Gabriel Eskobar, sepse siç nënvizoi, “vendi duhet të ecë përpara sa më shpejtë të jetë e mundur”.
“Ajo që do të doja të dëgjoja nga opozita është përkushtimi në rrugën e integrimeve euroatlantike. Dhe kjo përfshin shqyrtimin e mënyrave si Maqedonia të arrijë në Konferencën e ardhshme ndërqeveritare. Do të thoja se besueshmëria e procesit të zgjerimit varet nga Maqedonia e Veriut. Kemi një vend që ka bërë gjithçka që është e nevojshme për të kaluar në hapin tjetër dhe mendoj se e meriton hapin tjetër. Dhe mendoj se të gjithë, si brenda Bashkimit Evropian ashtu edhe në strukturat politike të Maqedonisë së Veriut, duhet të bëjnë gjithçka që është e mundur që kjo të ketë sukses”, nënvizon Eskobari.
Në këtë intervistë ai përmendi edhe projektin më të ri të ndërtimit të korridoreve 8 dhe 10D, të cilat i kundërshton në çdo mënyrë opozita me pretekstet e veta.
“Kemi një dialog me Qeverinë për pohime konkrete dhe mbështetje konkrete që mund të ofrojmë. Mund t’ju them se nga Uashingtoni, shqetësimi ynë më i madh është se korrupsioni është një nga sfidat më të mëdha për mbarë rajonin, jo vetëm për Maqedoninë e Veriut. Sekretari Blinken dhe kryeministri Kovaçevski kanë diskutuar gjatë për këtë në takimin e tyre, mënyrat rreth asaj se si mund të punojmë së bashku për të reduktuar korrupsionin në rajon. Kemi një interes të fuqishëm që të angazhohemi që Maqedonia e Veriut dhe vendet e tjera në rajon të bëjnë pjesën e tyre për të zvogëluar korrupsionin dhe për të zbatuar sundimin e ligjit. E vetmja gjë që mund të them është se kemi një partneritet të mirë me Maqedoninë e Veriut. Ata po bëjnë reforma dhe ne duhet të vazhdojmë ta thellojmë këtë bashkëpunim”, ka qenë porosia e skobarit nga intervista për Zërin e Amerikës, që dje shënoi 80 vjetorin e fillimit të punës.
Nga sa mund të analizohet, Eskobari e ka prekur thelbin e problemit.
Nëse analizohen porositë e tij, ai nuk e konteston veprimin dhe kauzat opozitare, por gjithsesi, lë të kuptohet se eprimi opozitar nuk duhet të rrezikojë rrugën eurotlantike të vendit.