Kurti ia rikonfirmon gatishmërinë emisarit Escobar për nënshkrimin e marrëveshjes

Kryeministri i Kosovës, Albin Kurti, e ka pritur sot në takim emisarin e SHBA-ve për dialogun mes Kosovës dhe Serbisë, Gabriel Escobar. Në njoftimin e lëshuar nga Zyra e Kryeministrit, theksohet se Kosova e konsideron si bazë të mirë propozimin evropian për arritjen e marrëveshjes përfundimtare.

“Propozimi Evropian është cilësuar dhe pranuar nga Kosova si bazë e mirë dhe platformë solide për të ecur përpara drejt normalizimit të plotë të marrëdhënieve ndërmjet Kosovës dhe Serbisë, me njohjen reciproke në qendër. Të përkushtuar, konstruktiv dhe kreativ, delegacioni qeveritar i Kosovës udhëton për në Ohër me vullnet të mirë, qëllime të mira dhe besim të mire”, thuhet në njoftim. Tutje, bëhet e ditur se në takim është diksutuar për takimin e nesërm dhe përgatitjet e fundit.

“U diskutua për takimin e nesërm në Ohër të Maqedonisë së Veriut për normalizim të marrëdhënieve ndërmjet Republikës së Kosovës dhe Serbisë bazuar në propozimin Evropian, përgatitjet rreth tij dhe pritjet nga ai takim”, theksohet në njoftimin e lëshuar nga Zyra e Kryeministrit.

Anën tjetër, Kurti e ka falënderuar emisarin Escobar për angazhimin dhe kontributin e tij dhe të Shteteve të Bashkuara të Amerikës në dialog. Ndryshe, Escobar, do të marrë pjesë në cilësinë e vëzhguesit në rundin e ri të dialogut mes Kosovës dhe Serbisë, që do të mbahet më 18 mars në Ohër të Maqedonisë së Veriut.

Më 18 mars, shefi i diplomacisë së BE-së, Josep Borrell, dhe i dërguari i bllokut për dialogun, Mirosllav Lajçak, fillimisht do të mbajnë takime dypalëshe me Kurtin dhe Vuçiq, dhe më pas është paraparë të mbahet takimi i përbashkët. Takimet dypalëshe pritet të nisin paraditen e së shtunës./Shqip