Analistët: Nëse VMRO-DPMNE mbron interesin shtetëror, duhet të votojë për ndryshimet kushtetuese

Meqenëse edhe opozitarja VMRO-DPMNE është deklaruar publikisht se mbështet procesin e anëtarësimit të vendit në Bashkimin Evropian (BE), atëherë për interesin e përgjithshëm të qytetarëve dhe vendit, deputetët e saj duhet që të mbështesin edhe ndryshimet kushtetuese të nevojshme për vazhdimin e rrugëtimit eurointegrues të vendit, thonë analistët politik për portalin Politiko.makdomen.net

“Meqenëse VMRO – DPMNE si parti janë deklaruar se mbështesin procesin e antarsimit të vendit në BE, meqenëse ky proces është për të mirën e të gjithë qytetarëve dhe vendit, pra edhe kjo parti duhet të ndihmoj në këtë moment. Jam thellë i bindur se ndryshimet kushtetuese do të ndodhin në afatin e parashikuar. Cila do të jetë marrëveshja apo kompromisi është diçka tjetër, se nuk mund të tallen me fatin e shtetit këtë e dinë të gjithë”, deklaroi ish-deputeti Zudi Xhelili për Politiko.makdomen.net

Politikologu Blagojçe Atanasoski vlerëson se opozita e udhëhequr nga VMRO-DPMNE duhet të marrë pjesë në gjithçka që do të thotë përparim drejt BE-së, sepse është një interes mbipartiak dhe kombëtar.

“Bllokimi i perspektivave evropiane sjell dëm për të gjithë, për qytetarët, për shtetin, për shoqërinë, për marrëdhëniet ndëretnike, por edhe për vetë VMRO-DPMNE-në si parti politike, sepse nëse nuk i miraton ndryshimet kushtetuese, mund të jetë të shpallur parti proruse dhe antiperëndimore dhe të mos lejohet fare të formojë qeveri, edhe në rast të fitores në zgjedhjet e ardhshme parlamentare”, deklaroi Atanasoski për Politiko.makdomen.net