Deputeti i BDI-së dhe ish pjesëtari i UÇK-së, Berat Ajdari, i është përgjigjur deklaratave luftënxitëse të deputetit të VMRO-DPMNE-së, Aleksandar Nikollovski. Në një prononcim për gazetën LAJM, Ajdari ka thënë se retorika e tillë e VMRO-së është e dëmshme për vendin dhe qytetarët. Ai ka bërë thirrje që t’i jepet fund këtij fjalori për të shmangur tensionet.
“Nikollovski, si edhe shefi i tij Mickoski vetëm në televizor e kanë parë luftën. Nuk na habisin këto deklarata luftënxitëse të Vmro-Dpmne-së. Ata edhe në të kaluarën kanë dëshmuar se janë armiku më i madh i Maqedonisë. Ju kujtohet çfare bënë më 27 prill të vitit 2017 për ta ruajtur pushtetin. Edhe këto deklarata që krijojnë tensione kanë për qëllim të rrisin rejtingun e partisë. Kjo retorike e Nikollovskit është vazhdimësi e shpifjeve që i bën çdo ditë Vmro-ja kundër BDI-së dhe çdo funksionari të suksesshëm shqiptar.
Bëjmë thirrje që t’i jepet fund këtij fjalori nxites për të shmangur tensionet, në një periudhë shumë të rëndësishme për vendin. Kërkojmë maturi dhe unitet që të mund t’i votojmë ndryshimet kushtetuese duke mos rrezikuar rrugëtimin e vendit drejt BE-së”, tha deputeti i BDI-së, Berat Ajdari, në një prononcim për gazetën LAJM.
Deputeti i VMRO-DPMNE-së, Aleksandër Nikollovski, dje në Kuvend deklaroi se hyrja e të gjitha partive shqiptare në Qeveri, rrezikon të shkatërrojë themelet e funksionimit të shtetit të Maqedonisë, që sipas tij, bazohet nën modelin – dy parti politike në pushtet, dy në opozitë.
“Në Maqedoni jo rastësisht ekzistojnë parti të maqedonasve, shqiptarëve, serbëve, turqve, vllahëve, romëve. Shikoni rreth vetes dhe do të shihni kë e keni në koalicion. Kjo është kështu për shkak të balancit etnik me të cilin funksionon ky shtet. Ju nëse dëshironi mund të eksperimentoni, por ato eksperimente do të na çojnë në rrënimin e Maqedonisë siç e njohim sot. Eksperimente të një gjenerate para nesh na sollën në konflikt të armatosur në vitin 2001. Kam frikë se eksperimentet që po i bëni tani, mund të na çojnë në një konflikt tjetër; dhe nëse në 2001 u ngritën shqiptarët, tani mund të ngritën maqedonasit. Mos e nënvlerësoni këtë që po ua them”, tha Nikollovski.