Dita e parë e deputetit Islam Alijaj në Parlamentin e Zvicrës

Seanca dimërore në Pallatin Federal të Zvicrës filloi të hënën, duke shënuar fillimin e një kapitulli të ri për deputetët Islam Alijaj dhe Philipp Kutter, të cilët për herë të parë marrin pjesë si deputetë në karrige me rrota. Televizioni publik zviceran ka vënë në qendër të vëmendjes këtë ngjarje, duke realizuar një kronikë të veçantë për të dy deputetët.

Ndërsa deputetët e tjerë kombëtarë prezantojnë kredencialet e tyre dhe hyjnë në Pallatin Federal, deputeti i sapozgjedhur i PS-së, Islam Alijaj, për shkak të aftësisë së kufizuar, duhet të përdorë një sistem ndryshe për të hyrë. Punonjësit e Zyrës Federale të Policisë i vijnë në ndihmë duke i hapur derën. Alijaj, 37-vjeçari nga Cyrihu, i cili ka paralizë cerebrale, është i njohur me punën parlamentare nga përvoja e tij në Asamblin Komunal të Cyrihut dhe vizitat e mëparshme në Parlamentin Federal. Tani, ai përjeton mjedisin parlamentar nga perspektiva e re si deputet nacional.

Alijaj shprehet me entuziazëm për rolin e tij të ri: “Është një ndjenjë e veçantë dhe jam i ngazëllyer për të filluar punën.” Ai tregon se ndihet shumë komod në prag të debatit në Dhomën Nacionale të Zvicrës, duke qeshur me zemër dhe duke shprehur emocionet e tij para seancës.

Philipp Kutter, një tjetër deputet nga Cyrihu dhe anëtar i Partisë së Qendrës, ka qenë pjesë e Dhomës Nacionale për pesë vjet. Pas një aksidenti në ski që e la të paralizuar nga qafa e poshtë, Kutter tani përdor një karrige me rrota. Ai thekson ndryshimet që ka përjetuar dhe mirënjohjen ndaj kolegëve të tij për pritjen e ngrohtë: “Ndihem i lumtur që jam përsëri këtu, dhe gatishmëria e të gjithëve për të ndihmuar është e jashtëzakonshme.”

Kutter dhe Alijaj kanë nevojë për asistentë dhe pajisje speciale për të përballuar sfidat e tyre unike, dhe pavarësisht se kjo do të kushtojë, ata janë të vendosur të kontribuojnë në mënyrën e tyre. Zyra parlamentare ka njoftuar se do të ofrojë mbështetje financiare.

Alijaj, i cili ka një pasion të madh për punën e tij të ardhshme, thekson rëndësinë e zërit të njerëzve me aftësi të kufizuara në politikën.

“Është thelbësore që ne të kemi një rol aktiv në hartimin e politikave që na prekin direkt.” Ai vlerëson mundësinë për të kontribuar në Dhomën Nacionale të Parlamentit si një hap i rëndësishëm për përfaqësimin e komunitetit të tij. (politiko.makdomen.net)