Grubi pas takimit me Xhejms O’Brajan: Përkrahja e SHBA-ve ka qenë dhe mbetet jetike për Maqedoninë e Veriut

Zëvendëskryeministër i parë dhe Ministër për Sistem Politik dhe Marrëdhënie Ndërmjet Bashkësive i Qeverisë së Republikës së Maqedonisë së Veriut, Artan Grubi i shoqëruar nga kryeministrit Dimitar Kovaçevski dhe kolegë ministra realizuan takim me Ndihmës Sekretarin Amerikan të Shtetit për Europë dhe Euro-Azi, Xhejms O’Brajan dhe Ambasadoren e SHBA-ve në vendin tonë, Angela Aggeler.

Fokusi i bisedës së takimit, siç njofton zëvendëskryeministri parë, ka qenë angazhimi serioz i Maqedonisë së Veriut në procesin e miratimit të ndryshimeve kushtetuese, organizimin dhe mbarëvajtjen e zgjedhjeve demokratike parlamentare dhe presidenciale, si dhe vazhdimin e realizimit të reformave.

“Bashkë me Kryeministrin Kovaçevski mirëpritëm sot në takim Ndihmës Sekretarin Amerikan të Shtetit për Europë dhe Euro-Azi, z. Xhejms O’Brajan dhe Ambasadoren e SHBA-ve në vendin tonë, znj. Angela Aggeler. Potencuam fokusin serioz të vendit tonë në procesin e miratimit të ndryshimeve kushtetuese, organizimin dhe mbarëvajtjen e zgjedhjeve demokratike parlamentare dhe presidenciale, vazhdimin e realizimit të të gjitha reformave të nevojshme dhe rëndësinë e madhe që ka për ne Plani i rritjes së Ballkanit Perëndimor si qasje e re për integrimin tonë më të shpejtë. Përkrahja e SHBA-ve ka qenë dhe mbetet jetike në çdo etapë të zhvillimit tonë të mëtejshëm demokratik”, është deklaruar pas takimit zëvendëskryeministri i parë – Artan Grubi.