Era e fortë shkakton dëme në Shkup dhe Strumicë

Një valë e erës së fortë ka përfshirë disa zona të Maqedonisë, duke shkaktuar dëme materiale në fasada, çati, pemë dhe automjete. Qendra për Menaxhimin e Krizave (QKK) ka raportuar se në Shkup ka pasur raste të rënies së pjesëve të fasadave të disa objekteve, duke përfshirë një pallat pranë Ministrisë së Drejtësisë . Gjithashtu, në gjashtë lokacione të ndryshme në kryeqytet, era ka rrëzuar pemë, të cilat kanë dëmtuar katër makina. Në disa shtëpi dhe ndërtesa, era ka shkaktuar dëmtime në çati. QKK-ja ka njoftuar komunat dhe ndërmarrjet publike për të ndërmarrë procedura të mëtutjeshme për riparimin e dëmeve. Nuk ka raportime për persona të lënduar nga era.

Në Strumicë, era e fortë ka bërë që çati prej llamarine të bien në tri lokacione, si dhe ka rrëzuar pemë në katër raste. Zjarrfikësit e Njësisë Territoriale të Zjarrfikjes Strumicë kanë intervenuar në të gjitha rastet. As në këtë qytet nuk ka të dhëna për të lënduar nga era.

QKK-ja u bën thirrje qytetarëve të jenë të kujdesshëm dhe të respektojnë rekomandimet e autoriteteve për të shmangur situata të rrezikshme. Era e fortë pritet të vazhdojë edhe sot, sipas parashikimeve të motit. (politiko.makdomen.net)