LSDM: Masat ekonomike po japin rezultate

Politikat e suksesshme ekonomike të Qeverisë së LSDM-së po japin rezultate, vlerësojnë nga LSDM. Nga partia në pushtet thonë se masat për uljen dhe ngrirjen e çmimeve të produkteve ushqimore bazë me çmim të garantuar ndikuan drejtpërdrejt në mbrojtjen e standardit të qytetarëve, por edhe në uljen e inflacionit. Këtë sipas LSDM-së e konfirmojnë edhe projeksionet më të reja të FMN-së.

“FMN ka përmirësuar parashikimet e saj për ekonominë maqedonase dhe parashikon një rritje prej 2.5% këtë vit dhe 3.2% për vitin 2024. Parashikimet e FMN-së janë se rritja e PBB-së në vend do të jetë më e lartë se ajo e Serbisë, Bullgarisë, Sllovenisë, si dhe 1.8 për qind më e lartë se mesatarja e BE-së. Maqedonia e ruajti edhe vlerësimin e kreditit “BB+” me një perspektivë të qëndrueshme, konfirmohet në raportin e fundit të agjencisë së vlerësimit të kredisë “Fitch””, u shpreh Darko Kaeski nga LSDM.

Me këtë qëndrim nuk pajtohen nga VMRO-DPMNE. SIpas partisë më të madhe opozitare shifrat e FMN-së tregojnë qartë se LSDM po e çon vendin drejt rrënimit ekonomik me inflacion dyshifror dhe rritje të dobët.

“FMN parashikon 10% inflacion për Maqedoninë në vitin 2023 dhe LSD sheh 5% me syze ngjyrë rozë. Mirë do të ishte t’u shpërndanin syze të tilla 1 milion e 800 mijëve që mbetën në vend, kështu që ndoshta dikush do t’i besojë. Qytetarët vështirë se e shohin rilindjen ekonomike për të cilën po flet LSD, kur në thelb jemi prapa Kosovës, Shqipërisë dhe Malit të Zi për sa i përket rritjes ekonomike. Të tre vendet nga mjedisi ynë kanë rritje ekonomike që është 50% më e lartë se Maqedonia.”, thuhet në reagimin e VMRO-DPMNE-së.

Sipas tyre me qeverinë e udhëhequr nga LSDM ekonomia jo vetëm që ka ngec në vend, por edhe ka shkuar prapa.