Suedia mund ta ilegalizojë djegien e Kuranit

Qeveria suedeze ta ndryshojë ligjin e protestave në vend pasi djegia publike e Kuranit në Stokholm çoi në reagime nga kombet dhe ndjekësit myslimanë në të gjithë botën.

Muajin e kaluar, Salwan Momika, një refugjat i lindur në Irak dogji një Kuran jashtë xhamisë kryesore të kryeqytetit suedez të Stokholmit në fund të qershorit gjatë festës së Kurban Bajramit.

Ministri suedez i Ligjit Gunnar Strommer i tha gazetës suedeze “Aftonbladet” se incidenti e ka bërë Suedinë një objektiv të dhunës xhihadiste.

“Ka pasur arrestime në Suedi me dyshimin për përgatitje për një vepër terroriste. Ka pasur arrestime në Gjermani me dyshimin për përgatitje për një vepër terroriste kundër Suedisë në dritën e kësaj. Ne gjithashtu mund të shohim se djegia e Kuranit javën e kaluar ka krijuar kërcënime për sigurinë tonë të brendshme”, citohet të ketë thënë Gunnar Strommer nga “Aftonbladet”, transmeton Klankosova.tv.

Strommer tha se Suedia duhet të analizojë situatën ligjore në dritën e ngjarjeve aktuale dhe tha se qeveria suedeze aktualisht është duke analizuar situatën dhe do të kthehet me konkluzione.

“Duhet të pyesim veten nëse rregulli aktual është i mirë apo nëse ka arsye për ta rishqyrtuar”, tha ai.

Ministri shtoi se Suedia është bërë “cak me prioritet” për sulme.

Incidenti pritet t’ia zgjasë rrugën Suedisë për anëtarësim në NATO me Turqinë e pakënaqur me mënyrën se si qeveria suedeze e trajtoi situatën. Turqia ka bllokuar kërkesën e Suedisë dhe pretendon se Stokholmi strehon elementë që Ankaraja i konsideron terroristë.

Irani, Arabia Saudite dhe Iraku dënuan njëzëri incidentin dhe Maroku tërhoqi ambasadorin e tij nga Suedia.

Në Pakistan, pakicat e krishtera kanë marrë kërcënime pasi Momika është një i krishter irakian. Vendi miratoi gjithashtu një legjislacion që kërkon që Suedia të ndërmarrë hapa kundër atyre që janë përfshirë në përdhosjen e librit të shenjtë.

Në Bagdad, një turmë protestuesish hynë gjithashtu në kompleksin e ambasadës suedeze dhe u desh të shpërndaheshin nga forcat e sigurisë.

Autoritetet dhanë leje për protestën e Momikës, por më vonë nisën një hetim duke thënë se ata po hetojnë aktin e tij të protestës si një “marifet” ose “akt të mundshëm agjitacioni kundër një grupi etnik”. /Klankosova.tv