“Ujëvarat poetike”, një përzgjedhje me poezi të 22 poetëve shqiptarë në gjuhën maqedonase

Këto ditë u botua libri “Ujëvarat poetike”, ku në gjuhën maqedonase janë prezantuar 22 poetë shqiptarë nga Maqedonia, Kosova dhe Shqipëria.

Libri “Ujëvarat poetike”, i cili është redaktuar, përkthyer nga shqip në maqedonisht dhe hartuar nga poeti dhe përkthyesi, Adem Abdullahu, është pjesë e bibliotekës “Urat” të botuesit “Ylberi Plus”.

Vetë emri i bibliotekës “Urat” tregon thelbin e poezisë – ajo është urë lidhëse mes popujve, thotë në pasthënien e librit poetja Gordana Karakashevska.

“Ky botim është shumë i rëndësishëm për njohjen e autorëve që jetojnë dhe veprojnë në këtë trevë. Kjo duhet të na kënaqë veçanërisht sepse bëhet fjalë për poezinë bashkëkohore.

Një nga cilësitë më emocionuese të poezisë është padyshim aftësia e saj për t’u kombinuar me shumë spontanitet, por edhe me shumë qëndrueshmëri, në fatin e vet dhe fatin e kombeve”, nënvizon Karakashevska.

Autori Adem Abdullahu sipas zgjedhjes dhe shijes së tij në këtë libër ka përfshirë poezi të autorëve: Agron Shole, Adem Abdullahu, Arjan T. Kalço, Akif Isaku, Bajramali Selimi, Behare Neziri, Daim Miftari, Daut Dauti, Dashamir Malo, Emine Islami, Enkeleida Mitrollari, Erina Qoku, Yusufzia Ademi, Majlinda Zeqiri-Shaqiri, Mark Simoni, Natasha Xhelili, Sadije Aliti, Sulejman Mehazi, Xhelal Tosku dhe Shefqete Gosalci.