“Po ndërtojmë unazën e kombit”, Grubi: Tiranë-Shkup-Prishtinë lidhen me autostradë

Zëvendës kryeministri i Maqedonisë së Veriut, Artan Grubi, tha se po punohet për të ndërtuar një unazë të kombit duke i lidhur Tiranën, Shkupin dhe Prishtinën përmes Korridorit 8-të.

I ftuar në një lidhje direkte në Euronews Albania, Grubi tha se me heqjen e kufirit me Shqipërinë, nuk do të ketë thjesht një lëvizje më të lirë të mallrave, por shqiptarët do të jenë më afër me njëri-tjetrin.

“Do të arrijmë heqjen e kufirit me Shqipërinë. Kjo do të mundësojë shumë më tepër se lëvizje të mallrave e të njerëzve. Do të mundësojë që njerëzit të njihen më tepër, martesat të bëhen më të shpeshta midis shqiptarëve të Shqipërisë dhe shqiptarëve të Maqedonisë së Veriut. Shqiptarët e Maqedonisë së Veriut do mund të blejnë prona në Durrës, apo Tiranë.

Është një projekt shumëdimensional të cilin njerëzit do ta kuptojnë sapo të nisë. Do të bëhet nga Prishtina në Shkup autostradë, nga Shkupi në Tiranë autostradë, nga Tirana deri në Prishtinë autostradë.

Njeriu mund të hajë mëngjesin në Shkup, të pijë kafen e drekës në Tiranë, pastaj darkën në Prishtinë dhe të kthehet në Shkup brenda shumë pak orësh. Po mundësojmë një unazë të kombit dhe jam jashtëzakonisht i lumtur për këtë që kemi arritur”, tha Artan Grubi për Euronews Albania.